shagawng ga na bai du sai.

Hui Loi mare ntsa na mu lu ai bum marawn ni


bungli grai wa shakut ai J.W hkawn zet brang zet ni rai nga ma ai.

Laban shani nawku jawng nnan (zepzi gaw nngut shi ai)hta mare masha ni hte jawngma ni rau sha Karai hpe naw ku


Ndai rai sai.. galaw nga dingyang naw ku jawng


mare masha ni mung ndai zawn kabu gara ka hkrang hte

mare makau na sumri mahkrai n tai n mai sa lai shakut yu nngai.


ndai mung sharin la sai (bungli mai hkan sai order le :P)


Ga n hkrum tim rau sha kabu gara zaibru jawm kayau

Hui Loi (bum ni a lapran na hkaraw ngu ai ga re ai da) ngu ai "Lawa(Wa)" kahtawng kasha kaw nawku jawng galaw ai de Thai jawngma ni hte rau work camp hku nna sa du da ai, mana jan grai du ai hpang she nga ai dorm de bai du wa ai. Internet mung nnga, fone mung n mai shaga mungkan ting hte tsan mat wa ai zawn nga hkam sha kau ni ai. Hui Loi gaw Chiang Mai mare kaw na 460 km tsan ai shagawng bumga re ai.

Ga mung n hkrum re lapran kaw bat mi tup grai ba let grai mung pyaw sai . J.W num ni kade byin ai lam atsam wa madun da sai rai nga ai. :P

Jahpawt hkying 8 kaw na shana maga 5 du hkra, shani shagu zaibru hte kayau kaya she rai sai. shana rai jang ngai hte rau gawk na manang ni kahtap gala (grai tsu ai majaw massage le). Yawng yawng ru ru ra ra mani hte sum grai pyaw sai le.

Shana shagu ngu na daram marang bai htu, la lung ai sleepingbag sha gaw grai hpa mat ai zawn she nga, manang ni hte nba jawm kashun hkat, grai kashung ai majaw le.

Laban shani gaw anhte galaw da ai magam hpe makun bu ai hte hpawn mare masha ni hte rau dai nawku jawng nnan hta jawm nawku nna yawng hpe shakram da let CM de kabu gara du wa saga ai. Karai hpe chyeju shakawn ai!

Rawt sai

San poi ngut nna zeng ngu pyi n lu hkring la ai zawn nga ai yang.. work camp da... ngai nga ai kaw na loi mi gaw tsan ai zawn nga shiga na ai ..

Nnan e gaw.. reason lama ma tam la nna jang n sa na kun ngu ai raitim , ndai gaw ngai na matu shara nnan langai mi de du ga ai hte mahkrum madup nnan, Thai jawngma ni hte fellowship, kanoi bum ngu na shara de nga ai Thai mungdan na hpung masha ni a lam mung chye mayu ai majaw naw rawt sai..

Internet nga ai shara rai yang gaw mahkrum madup ni bai wa kapaw da na nngai.. Raitim dai mung n chye tsun shi ai.. du jang she chye na re.. 29th of March kaw she nga ai shara de bai du na hku re..

Sik hkwi ngu la hkra di naw rawt na sai...

hka hkrup shayi!

Law la ai "ngai"

I am special for God has created me as special

I am lovely for being rounded with God's love and your love

I am beautiful for God has given you beautiful eyes to see

I am wonderful for being living in this wonderful universe

I am different for God has created that differences are beautiful

I am proud of being J.W amyu shayi

So, I am responsible for this whole being

I am happy that God has created me on this day

I am glad that I have a chance to say "thank you" to my parents, and siblings, and my friends

I love you God because you love me first,

And I love you!

There are still so many I ams that God has made me


(note for a special day 23rd of March,2009 Monday)

The cost of discipleship

Daini gaw sanpoi na matu hkyen let.. loi mi bri bri nga ai shaloi.. gasi langai hpe ndai kaw kapaw na matu myit dum ai. Dai gaw "the cost of discipleship " ngu ai German karai masa mu nu (theologian) Dietrich Bonhoeffer kaw na pru wa ai gasi rai nga ai. Ndai theologian gaw Nazi ni rawt nga ai aten Hitler hpe gyam sat na matu hkyen ai kaw lawm ai hkristan langai re. Hpang jahtum e shi gaw Nazi ni a n pu hta rim hkrum nna sat kau ai hkrum nu ai. Daini na aten du hkra Karai masa hpe sharin hka ja ai ni yawng gaw shi a hkristan (being christian) ngu ai a n tsa shi a karai masa ningmu hpe n tawt lai lu ai nga ai (myit hkrum ai hte n hkrum ai sha shai na re). Ndai ga si gaw anhte jinghpaw wunpawng myu sha ni a matu mung grai nan sharin la mai lam re ngu nna, ndai kaw ngai chye na ai made me kapaw dat ai law.

Shi tsun ai "the cost of discipleship" "Sape tai ai a manu"(ngai chye na ai hku gale da ai ), ngu ga le i. Ndai sape tai a manu hpe n tsun shi yang shi tsun ai langai naw nga ai "cheap grace" "a loi hte lu la ai (manu hpa ai) shaman chyeju" ngu ga i. Ndai "cheap grace" gaw nang hku nna nawku hpung a makam ni (doctrines) hpe kam jang (ta tut n lawm ai sha) tinang nan hpa shakut shaja shang lawm ai lam n galaw ra sai sha mara dat ya ai hkrum let hkye hkrang la ai lu la na re ngu ai hpe htawng madun mayu ai lam rai nga ai. Ndai zawn re makam gaw Karai kasang a awm dawm shaman chyeju (free grace) ngu ai hpe dai "cheap grace" maga hku nna htai la ai lam rai nga ai.
Bonhoeffer tsun mayu ai gaw, Karai kasang kaw na awm dawm shaman chyeju gaw manu n hpa ai lam tsun nga ai. Ndai Karai kasang kaw nna jaw ya ai awm dawm shaman chyeju gaw anhte hkristan ni hku nna grau nna ahkyak la let Yesu a sape tai ai manu hpe jaw na matu rai nga ai, anhte hpe ningnan shabyin ai, galai jashai ya sai re.

Sape tai a manu ( cost of discipleship) ngu ai hta lit grai nga nga ai hpe mu lu ai. Nawku jawng sa nna ngut ai n re, nang hkrai na gawk kaw kyu hpyi nna ngut mat ai n re. Hkristan ni gaw shi a sape tai na matu shaga la hkrum sai, dai majaw gingdan ai sape ni tai na matu ahkyak nga ga ai re. Anhte amyu sha ni Karai a awm dawm shaman chyeju a majaw daini anhte n tai n mai raitim, amyu sha langai hku nna Karai a man, masha a man hte tsap nga lu ga ai. Karai a man hta sape tai ai amyu sha ni kade daram ngang grin nga saga ai kun? Shinggyim masha gaw shinggyim masha hte n mai daw hka nga ai hte maren, anhte nga nga ai shinggyim hpawng (society)kata hta nang, ngai Jinghpaw wunpawng shinggyim sape "Hkristu a hpang hkan" ai ni hku nna manu kade dan nga ga ta? akyu jaw nga ga ai kun? myit yu na lam langai rai nga ai.

Anhte Jinghpaw wunpawng hkristan ni hta gaw hkristan ngu ai hkristu a hpang hkan kaja tai na mung ahkyak nga ai. Dai mung anhte jaw ra ai manu jahpu langai re. Jinghpaw wunpawng hku nna mung tsap ra nga ga ai. Dai mung nang, ngai n mai hprai ai lit langai re.

Dai majaw, anhte hta e n law dik htum magam lit kaba lahkawng gaw gun ra chyalu rai nga ga ai. Shinggyim u hpung u hpawng kata hta Jinghpaw wunpawng hkristan hku nna jan, rai tsap lu na matu gaw, HKristan & Jinghpaw wunpawng ngu ai lit ni rai nga ai.Tinang hkum tinang Jinghpaw Wunpawng Hkristan langai hku nna tinang nga ai shara, shinggyim hpawng hta tinang re ai hte maren sak hkrung na nga yang gaw ndai (beings) lahkawng hte maren sak hkrung ra na ga ai. Dai hta e, lama na tinang gaw Jinghpaw wunpawng hkristan ramma rai yang ramma, dinghku kanu/kawa, kasha/kashu, jawngma, bungli galaw ai wa/jan, ndai hku rai nna lit ni gaw shi hte shi hkan nang ra na ga ai kun ngu nna mu mada hkap la kam sham ai lam hpe kapaw dat sai law...
Manaw manang ni a ningmu hpe mung kapaw da marit le... chyeju kaba sai!!!!!!!!!!!


Ga ngam: Hkristan re ai anhte Jinghpaw wunpawng sha ni hpe ngai chye na ai "Jinghpaw wunpawng hkristan ni a lit" ka hkrup ai lam sha re ai. Kaga makam hpe nawku ai Jinghpaw wunpawng myu sha ni hpe n tsun mayu ai lam chye na shangun mayu ai.

Reference: Hordern, William, A Layman's Guide to Protestant Theology (revised edition), Wipf & Stock Publishers: Eugene, 2002.

Dai gaw n shakut ra na n hten.....

Daini na aten hta mungkan shara shagu wa n rai tim , mungkan mungdan tsawm ra mi hta e anhte Jinghpaw Wunpawng myu sha ni lam amyu myu hku du nga saga ai. Kaning ngu ai baw rai kun ? Anhte na ga ga re "pru sa ai amyu" ngu na kun? Du sa ai lam hta lam magup hku nna rai na re.... Gara hku mi du du , du nga saga ai. Ndai zawn rai maigan mungdan de du nga ai anhte Jinghpaw Wunpawng myu sha ni hpe langai mi tsun mayu ai law.. Nkau gaw n rai na re.. raitim ngai mu mada ai n kau gaw dai hku rai taw nga ga ai..
Ga shadawn, Thai mungdan hta nga nga ai Amyu sha n kau mi ngu ga, Shada hkrum yang "Sawa dee hka/hkrap " (hello!) nga shakram kyin, kanu kawa ni tinang a kasha hpe "hkawp hkun hka/hkrap" (chyeju kaba sai) nga tsun sharin shakut bu nga ai hpe mu lu nga ga ai. Ya n dai lam gaw ngai kaw na pru ai ga sha n rai nga ai. Ngai hte rau manang ni jawm jahta ai kaw na ngai na la/ hkam la/ chye la ai lam hpe ndai kaw kalang bai kapaw hkrup sai ga re ai law.
Ndai zawn masha ni a mungdan de anhte amyu ni law law du nga wa saga ai majaw, masha a mung dan hta e Jinghpaw Wunpawng amyu sha langai (Karai hpan da ai amyu) hku nna she anhte nga shakut ra na ga ai kun?? ngu ai le.. Masha ni a lapran kaw nga nga taw nga sai re majaw, masha ni a htunghking ni hpe n hkungga ga, n sharin la ga ngu ai n re ai. Sharin, hkungga ga, jai lang ga, raitim, anhte shada da hkrum ai shara (ga shadawn, nawku hpung) zawn re kaw sha pyi anhte a ga, htunghking ni hpe atsawm sha sharin ya, jai lang ra na ga ai kun law.... Masha ni a lapran hta nga ai shaloi masha amyu ni zawn gaw anhte n tai shakut ra na nhten..... Anhte a myu grin nga na matu gaw daini na prat mawru masa ni hpe yu yang anhte Jinghpaw Wunpawng nan tai shakut ra nga ga ai (manang langai a ga hpe la kap ai). Jinghpaw Wunpawng tai shakut ra na re..
Jinghpaw Wunpawng n tai shakut yang gaw anhte grin nga na matu n loi na re. Maigan de nga ai ni sha n re ai anhte mungdan kata kaw nga ai ni mung n dum shami tinang gaw tinang a shara kaw nan rai taw nga ai nga majaw ahkyak n shatai ai zawn re ni grai nga chye ai.
Daini na anhte amyu sha ni lapran na sut masa, mung masa, hpaji masa, ndai zawn re masa lam amyu myu gaw anhte hpe Jinghpaw Wunpawng ngu ai tai shakut ra nga sai ngu ai hpe madun nga ai. Jinghpaw Wunpawng myu sha tai shakut ai ngu ai shaloi , karai kasang hpan da ai Jinghpaw wunpawng amyu sha re ai majaw, dai hpan da ai ngu ai karai kasang a hkrang (image) gaw anhte hta rawng nga sai. Ndai hkrang hpe anhte shamat yang gaw, anhte Jinghpaw wunpawng amyu sha ni Karai jaw da ai Jinghpaw Wunpawng ngu ai amyu hpe hkang zing, galu kaba wa hkra galaw ra ai lit hpe hprai ai ni she anhte rai mat na ga ai.
Dai majaw, Karai jaw ai lit mung n hprai, anhte amyu sha mung ngang grin, galu kaba wa na matu gaw anhte daini na mungkan hta Jinghpaw Wunpawng tai shakut ra na nhten...
Kaga amyu gaw anhte n tai shakut ra na n hten.. n tai shakut tim pyi n dum shami kayau kaya re ai kaw, mat wa nga yang, bai tai shakut yang gaw... :-( .. yawn hpa she rai na sai n hten law..

Jinghpaw Wunpawng Amyu sha tai shakut ga!

Shachyen ya mayu nngai (3)

Jawng gawk, laika dum, nawku daw jau ai shara ni gaw ndai building kaw rai nga ai.



Jawngma nga nta (Bethshalom)


Chiang Mai Mare na Payap University hpe na ga ai ni mung na ga na sai. Ndai dakkasu hta International programs n kau mung nga nga ai, ga shadawn, MBA, TESOl, Linguistics, hte Divinity ni rai nga ai. Anhte Wunpawng jawngma ni kaga kaw kade daram nga ai kun gaw n chye ai, raitim ngai chye ai daram nga yang gaw n law htum Wunpawng jawngma marai (5) gaw hpaji sharin hka ja nga ai lam chye lu ai.
Ya ndai kaw ngai hku nna loi mi tsun dan mayu ai gaw MCD a lam rai nga ai. McGilvary College of Divinity ngu ai gaw Payap University a faculty langai rai nga ai Chyum jawng ngu ga le. MCD gaw Presbyterian Nawku hpung hta e npawt tawn nna hpaw da ai chyum jawng langai rai nga ai. Ndai faculty hta B.A, B.Th, M.Div (Thai), M.Div (International), hte kaga ministry courses ni hpe jaw nga ma ai. M.Div (International) kaw gaw madung jawngma ni hku nna Vietnam, Combodia, Myen Mung, Korea, Japan, Thai, hte America de na 2,3 rai nna Asia mungdan kata na jawngma ni hpe madung dat nna hpaw da ai jawng rai nga ai. Dai hta, Myen Mung jawngma ni hku nna hpu nau Chin, Lahu hte anhte Wunpawng jawngma ni hku nna sharin hka ja nga ga ai. Wunpawng jawngma ni hpe gaw 2 ning hta marai 2 hku nna scholarship hte hkap la nga ai lam mu lu ai. Scholarship hte n re ai sha tinang hkrai support galaw nna lung na nga yang gaw grai loi ai hku nna n dai jawng de mai apply galaw nga ai.
Maigan Sinna mungdan de na Professors ni hte Local Professors ni Sa sana ni hku nna mung yaw shada let hpaw da ai jawng re ai lam hpe mu hkrup nngai. Yaw shada ai Sa sana mahkrun kade daram awng dang ai kun gaw n chye ai, raitim anhte Wunpawng myu sha ni a matu mung jawngma ni hpe scholarship hte hkap la (Recommendation hkrak rai yang ) ya nga ai majaw chyeju dum bu nga nngai. (chyum jawng a lam chye ai ni a matu - Ndai jawng mung ATESEA a n pu na jawng langai rai nga ai).

Shachyen ya mayu nngai (2)

Ban Mai Jinghpaw kahtawng manau shadung
Ban Mai Jinghpaw kahtawng gaw shawng kaw tsun da sai hte maren, Thai hkawhkam wa kaw nna Wunpawng amyu sha ni a matu masat da ya ai shara langai rai nga ai. Ndai Ban Mai Jinghpaw kahtawng gaw Wunpawng myu sha ni hpe Thai mungdan a Bum Nga Amyu ni hku nna masat la da ai lam sak se langai mi hku mung rai nga ai ngu chye na lu ai. Wunpawng Amyu sha ni Thai mungdan kaw Bum Nga Amyu (Hill tribe people) nga ai hku nna mungchying masat la ma ai.
Daini Thai mungdan de du nga ai Wunpawng myu sha n kau mi mung du sa ai lam gaw amyu myu re ai, raitim n kau gaw Thai mung chying masat lu na matu Hill Tribe People ngu ai hpe hkam la shajang nga ma ai.
Ban Mai Jinghpaw Kahtawng na nawku jawng
Ban Mai Jinghpaw kahtawng hta Wunpawng myu sha ni htinggaw 30 jan daram nga nna kaga amyu ni mung nga nga ma ai lam mu lu ai re. Myen mung ga jarit hte mung tsawm ra ni ai shara re. Moi de gaw dai jarit hku nna pru pru shang shang grai mai galaw lai wa sai shara langai mi re nga chye lu ai. Dut lu dut sha ni mung grai kaja lai wa sai hpe chye lu ai. Ya du hkra mung dai jarit shara kaw Myen mung de na lusha zawn re ni hpe naw mai lu ai lam mu mada ai.
Ban Mai kahtawng de du ai shaloi ngai mu mada ai lam langai gaw, ramma ni gaw kahtawng kata hta ra ai shaloi, ga shadawn, lamang lama ma nga ai ten (special occasion) rai yang she kahtawng de wa ai lam hpe mu lu ai. Law malawng kahtawng kaw nga ai gaw asak kaba sai dinggai dingla ni hte ma kaji ni re ai hpe mu lu ai. Ramma n gun naw ja ai ni gaw law malawng pa ga (myo ga ) de sa nna bungli galaw, jawng lung re ai lam hpe chye lu ai. Ndai Ban Mai kahtawng hta e Jinghpaw ga hte hkrak rai nna laban shani hta nawku nga ma ai hpe mung mu lu ai re. Ndai kaw nga nga ai ni gaw Sammung ga na ni law malawng re ai hpe mung shachyen shaga la lu nngai. Ban Mai kahtawng kaw nan gaw grai nga rai na makan bungli ni hpe galaw lu galaw sha ai lam n mu ai (ngai n mu ai mung mai byin ai). Kachyi kachyaw hkai lu hkai sha, rem lu rem sha gaw nga ai. Ngai mu chye ai daram Chiang Mai wunpawng amyu sha a lam...... ang wa ai hta hkan nna dum hkrup jang bai matut ka na nngai...

Shakut ga????

Daina kaja sha ngai tsun mayu ai lam gaw ya ndai madaw she re ai.. ndai blog hpe galaw hpang ai mung ndai lam hpe kapaw mayu ai majaw re.
Shakut ga ngu ai ga si gaw anhte shani shagu shara shagu masha shagu tsun ai gasi rai nga ai. Shani shagu Wunpawng myu sha ni lang ai hkrum ai shara shagu mung n dai gasi hpe tsun nga ga ai. Ya ngai tsun mayu ai lam gaw, ndai shakut ga ngu ai gasi gaw grai mai kaja ai lam re. Raitim shakut ga, shakut ga nga nna hpa shakut na re ai mung n chye, tinang hpa galaw nga ai re mung n chye, hpa hpe shakut ga nga ai ga ta?? ngu nna ga san san mayu wa nga ai le. Shakut ga ngu ai kaw sha jahkring da na kun? Shakut ga ngu n tsun ga nngu mayu nngai, raitim shakut ga ngu ai shaloi, tinang hta e hpa hpe shakut ra nga ai, hpa hpe shakut mayu nga ai, hpa a matu shakut mayu, shakut ra nga ai ngu ai hpe asan sha chye nna, shakut ai rai yang gaw grau mi htap htuk ai hte tang du kun ngu myit dum ai le. ga shadawn, jawngma wa hpe laika shakut, hpa majaw jawngma gaw laika shakut ra a ta? chye na matu, chye ai hpe jaw hkrak htap htuk mai kaja ai hku akyu jashawn jai lang lu na matu, tinang a matu sha n re, tinang hte seng ang ai wuhpung wuhpawng a matu du hkra chye myit na matu, zawn re ni.....
Anhte shakut ga nga wa ai grai na la saga ai. Ndai ga hpe n tsun ga ngu ai lam n re. Tsun ga, n gun jaw hkat ga, raitim hpa majaw, hpa a matu, kaning rai, shakut ai ngu ai hpe gaw asan sha shawng sawn dum myit mada yaw shada ai lam nga yang she "shakut ga " ngu gasi gaw lachyum grau rawng nna anhte amyu sha a matu asak rawng wa nhten.... ngu hti hkrup nna sawn hkrup ai lam hpe ndai kaw kapaw da ai law...

Shachyen ya mayu nngai (1)

Thai mungdan, Chiang Mai mare gaw, anhte wunpawng myu sha ni hte nau n tsan ai (hku hkau ai) ginra langai mi rai nga ai. Chiang Mai mare hta e Wunpawng myu sha ni law law nga nga ga ai. Lam amyu myu hku nna du sa ai (rawt malan ten na nga nga ai ni, ja gumhpraw tam na matu du sa ai ni, NGO bungli hte seng ai ni, hpaji sharin na matu du sa ai ni, na hkrup ai majaw du sa ai ni) ni rai nga ai. Ndai zawn rai du sa ai ni hta n kau gaw nawku hpung de lu du ai, n kau gaw nawku jawng gara kaw re ai pyi n chye ai, n kau gaw du mayu tim n lu du ai, ndai zawn rai na Wunpawng amyu sha ni hpan hkum dik ai hku nna nga nga ai shara langai re ngu mu mada nngai.
Ndai zawn rai Wunpawng myu sha ni law law nga ai hte maren, nawku hpung ni mung law law nga ai. Dai hta e WCC (Wunpawng Christian Church), Wunpawng Hkristan Nawku Hpung hpe mung lai wa sai 10 ning jan kaw nna rau sha jawm nawku hpawng de nga sai. Kaga maigan ga hku nna nawku ai nawku hpung ni mung law law nga ai. Ndai Thailand mungdan hta Wunpawng myu sha ni hpe Thai Hkawhkam wa kaw nna tsaw ra myit hte Jinghpaw mare nga nna gaw de na matu ahkaw ahkang jaw ya nna masat ya ai lam mung nga sai. Wunpawng amyu sha ni hpe mung Thai mungchying masha masat ai lam (Citizenship) mung galaw nga ai hpe mu mada lu ai (nga ai shaning ni hta hkan nna). Ndai kaw tsun dan mayu ai lam gaw Jinghpaw mare (Ban Mai ngu ai re) mung nga ai lam shachyen ya mayu ai.
Gau ngwi sha bai matut shachye na sai.. Daina gaw ndai hte kaw naw jahkring da na nngai.

ka hkrup sai

Ka hkrup sai .. ya chyawm me gaw... Blog ka na matu hkyen ai grai na sai. Raitim galoi mung update n lu galaw na hpe tsang la ai majaw ya du hkra sharang da ai re. Daina chyawm me gaw, sawn hkrup ai lam hpe grai ka mayu wa, hti hkrup ai lam hpe ngai na ningmu hte grai jahta mayu wa re ai majaw, ndai kaw blog nnan langai hpe hpaw nna kapaw kau ai lam langai mi she rai na sai. Ndai kaw ngai mu hkrup ai lam, sawn hkrup ai lam, hti hkrup ai lam, jahta hkrup ai lam ni hpe nye a kraw kata kaw nan shapraw da ai lam rai na kun.................