"Anhte a lit " da

Daina gaw, manang langai ka shalat ai mahkawn shagun jaw dat ai majaw madat byin ai. Anhte a makau grupyin hte seng ai (grau nna WP mungdan hte seng ai) mahkawn langai rai nga ai.

Gabaw gaw "Anhte a lit", ngai bai jaw ai gaw "Kau da ga i" bai ngu le. dai mahkawn kaw na hta la ai ga ... :)

Hpa ni wa kau da ra na ga ai kun??? Mahkawn hta gaw, Jiwoi/wa ni madu da ai lamu ga hpe anhte a lata hta rai yang ginlut kau na kun ??? da....Anhte a LAMU GA hte seng nna tinggyeng myit, law hpa myit marin ai lam ni hpe kau da ga i... da..

Ndai mahkawn hpe madat ai shaloi, sawn dum ai... Anhte a LAMU GA ngu nna anhte madu da ai (mying hta le), hpe anhte Jinghpaw Wunpawng amyu sha ni gara hku nna lachyum shaw nga ga ai kun?? Daini ndai daram anhte a LAMU GA ni hten za ayai aya , du hkra ladaw ni n ru n ra, hpa majaw ngu ai hpe anhte yawng mu chye nga ga ai.

LAMU GA ngu dat ai shaloi, tinang hte ni dik htum ai, tinang hte nta masha ni nga ai dum nta gaw gap da ai shara, sun wang, yi sun, hkau na, dai kaw nna, WP mungdan ngu ai du hkra anhte ni myit dum na ga ai.

LAMU GA ngu ai gasi hpe na dat, mu dat ai shaloi , ndai gasi gaw nang/ ngai hpe hpa tsun nga ai kun ngu ai hpe kalang bai myit dum ai.

Israela amyu ni a LAMU GA ngu ai lachyum hpe Chyum laika hta hka ja la lu ai hku nga yang, daini anhte amyu masha ni LAMU GA hpe gara hku lachyum shaleng nna, ndai hpe gara hku galaw nga ga ai kun ngu ai hpe ngai hkrai sumru yu, rai nna me ndai kaw galu kalang ngu ka jahkrat dat ai ga rai sai law.

Chyum laika hta na LAMU GA a lachyum ni gaw.....

1) Karai kaw na chyeju kumhpa re . (Gracious gift of God )

2) Karai hte Israela amyu sha ni a lapran na Ga shaka hpe shangang shagrin ai kri re. (The concrete expression of Covenant)

3) Sali wunli dagraw hkam la ai lam re (Inheritance from God and Forefathers)

4) Madu da lu ai ahkyak dik ai sutgan re (Possession)

5) Shim lum let hkring sa baw jahkrat ai shara re (Place of safety rest)

6) Lamu ga a alak mi dan dawng ai ahkyak ai lam ni hte dai lamu ga hta shanu ai amyu masha (the significant of the Land and its inhabitants)

- galaw lu/sha ai lam (grau nna hkai lu/sha ai lam) (Agriculture, economics)

- Makam masham (religious)

- Amyu sha sari, awm dawm ahkaw ahkang kumla (nationhood)

Anhte J.W amyu sha ni a matu mung lamu ga ngu ai gaw ndai lachyum ni hte kade n shai na kun ngu, ngai hku nna chye na hkam sha lu ai. Dr. N-gan Tang Gun tsun ga ai ga hpe naw dum ai "lamu ga ngu ai gaw singkaw tu ai, tinang nga nga ai lamu ga hpe atsawm sha hkungga la ra ai hte n hkangzing, n gawn lajang ai rai yang tinang kaw nna kaga de pyen mat wa na re" da.

Ajaan Eva Pascal (ngai na Pentateuch sarama) gaw "The land is the great message for the next generation" da. Dai lu.....anhte a hpang na ban ni hpe Amyu Langai ngu ai a manu dan dik htum ai ndai mungga hpe jaw da lu na ga ai kun??? hpa wa me ginlen shalai da na ga ai kun i??

"Anhte a lit" gaw lamu ga ngu ai mungga hpe anhte a hpang na ban ni hpe jaw da lu hkra shakut na lit ngu hkam la let lit lu dum ai ni lit la nna hpa wa mi galaw na ga ai kun?? ngai mung n chye sai law.... hpa gaw n hkaw hkaw rai na ga ga gaw.. lamu n dung du... raitim kraw hkrat ga gaw re ai..

The cost of discipleship

Daini gaw sanpoi na matu hkyen let.. loi mi bri bri nga ai shaloi.. gasi langai hpe ndai kaw kapaw na matu myit dum ai. Dai gaw "the cost of discipleship " ngu ai German karai masa mu nu (theologian) Dietrich Bonhoeffer kaw na pru wa ai gasi rai nga ai. Ndai theologian gaw Nazi ni rawt nga ai aten Hitler hpe gyam sat na matu hkyen ai kaw lawm ai hkristan langai re. Hpang jahtum e shi gaw Nazi ni a n pu hta rim hkrum nna sat kau ai hkrum nu ai. Daini na aten du hkra Karai masa hpe sharin hka ja ai ni yawng gaw shi a hkristan (being christian) ngu ai a n tsa shi a karai masa ningmu hpe n tawt lai lu ai nga ai (myit hkrum ai hte n hkrum ai sha shai na re). Ndai ga si gaw anhte jinghpaw wunpawng myu sha ni a matu mung grai nan sharin la mai lam re ngu nna, ndai kaw ngai chye na ai made me kapaw dat ai law.

Shi tsun ai "the cost of discipleship" "Sape tai ai a manu"(ngai chye na ai hku gale da ai ), ngu ga le i. Ndai sape tai a manu hpe n tsun shi yang shi tsun ai langai naw nga ai "cheap grace" "a loi hte lu la ai (manu hpa ai) shaman chyeju" ngu ga i. Ndai "cheap grace" gaw nang hku nna nawku hpung a makam ni (doctrines) hpe kam jang (ta tut n lawm ai sha) tinang nan hpa shakut shaja shang lawm ai lam n galaw ra sai sha mara dat ya ai hkrum let hkye hkrang la ai lu la na re ngu ai hpe htawng madun mayu ai lam rai nga ai. Ndai zawn re makam gaw Karai kasang a awm dawm shaman chyeju (free grace) ngu ai hpe dai "cheap grace" maga hku nna htai la ai lam rai nga ai.
Bonhoeffer tsun mayu ai gaw, Karai kasang kaw na awm dawm shaman chyeju gaw manu n hpa ai lam tsun nga ai. Ndai Karai kasang kaw nna jaw ya ai awm dawm shaman chyeju gaw anhte hkristan ni hku nna grau nna ahkyak la let Yesu a sape tai ai manu hpe jaw na matu rai nga ai, anhte hpe ningnan shabyin ai, galai jashai ya sai re.

Sape tai a manu ( cost of discipleship) ngu ai hta lit grai nga nga ai hpe mu lu ai. Nawku jawng sa nna ngut ai n re, nang hkrai na gawk kaw kyu hpyi nna ngut mat ai n re. Hkristan ni gaw shi a sape tai na matu shaga la hkrum sai, dai majaw gingdan ai sape ni tai na matu ahkyak nga ga ai re. Anhte amyu sha ni Karai a awm dawm shaman chyeju a majaw daini anhte n tai n mai raitim, amyu sha langai hku nna Karai a man, masha a man hte tsap nga lu ga ai. Karai a man hta sape tai ai amyu sha ni kade daram ngang grin nga saga ai kun? Shinggyim masha gaw shinggyim masha hte n mai daw hka nga ai hte maren, anhte nga nga ai shinggyim hpawng (society)kata hta nang, ngai Jinghpaw wunpawng shinggyim sape "Hkristu a hpang hkan" ai ni hku nna manu kade dan nga ga ta? akyu jaw nga ga ai kun? myit yu na lam langai rai nga ai.

Anhte Jinghpaw wunpawng hkristan ni hta gaw hkristan ngu ai hkristu a hpang hkan kaja tai na mung ahkyak nga ai. Dai mung anhte jaw ra ai manu jahpu langai re. Jinghpaw wunpawng hku nna mung tsap ra nga ga ai. Dai mung nang, ngai n mai hprai ai lit langai re.

Dai majaw, anhte hta e n law dik htum magam lit kaba lahkawng gaw gun ra chyalu rai nga ga ai. Shinggyim u hpung u hpawng kata hta Jinghpaw wunpawng hkristan hku nna jan, rai tsap lu na matu gaw, HKristan & Jinghpaw wunpawng ngu ai lit ni rai nga ai.Tinang hkum tinang Jinghpaw Wunpawng Hkristan langai hku nna tinang nga ai shara, shinggyim hpawng hta tinang re ai hte maren sak hkrung na nga yang gaw ndai (beings) lahkawng hte maren sak hkrung ra na ga ai. Dai hta e, lama na tinang gaw Jinghpaw wunpawng hkristan ramma rai yang ramma, dinghku kanu/kawa, kasha/kashu, jawngma, bungli galaw ai wa/jan, ndai hku rai nna lit ni gaw shi hte shi hkan nang ra na ga ai kun ngu nna mu mada hkap la kam sham ai lam hpe kapaw dat sai law...
Manaw manang ni a ningmu hpe mung kapaw da marit le... chyeju kaba sai!!!!!!!!!!!


Ga ngam: Hkristan re ai anhte Jinghpaw wunpawng sha ni hpe ngai chye na ai "Jinghpaw wunpawng hkristan ni a lit" ka hkrup ai lam sha re ai. Kaga makam hpe nawku ai Jinghpaw wunpawng myu sha ni hpe n tsun mayu ai lam chye na shangun mayu ai.

Reference: Hordern, William, A Layman's Guide to Protestant Theology (revised edition), Wipf & Stock Publishers: Eugene, 2002.